Ўзбекистонда Android учун мўлжалланган Opera’дан фойдаланувчилар сони 44 фоизга ошди

Ўзбекистонда Android учун мўлжалланган Opera’дан фойдаланувчилар сони 44 фоизга ошди

Ўзбекистонлик Opera Mini фойдаланувчилари асосан Google ва Yandex орқали излашади, «Одноклассники»да мулоқот қилишади, шунингдек, YouTube’да видео томоша қилишади. Бу ҳақда «Газета.uz» интернет-нашри хабар бермоқда. Android учун мўлжалланган Opera браузерининг ўзбекистонлик фойдаланувчилари сони 2013 йилнинг

учинчи чорагида 44 фоизга етди, дейилади State of the Mobile Web’нинг 23 октябрь куни эълон қилинган ҳисоботида. Учинчи чоракда Ўзбекистонда Opera’нинг мобил браузерларидан фойдаланувчилар орасида смартфон эгалари улуши 2,4 фоизга ошиб, 19,4 фоизни ташкил этган. Хусусан, Android платформасидаги смартфон эгаларис они 19 фоизга, iOS базасидаги қурилма эгалари сони эса 14,3 фоизга кўпайган.

Opera’нинг қайд этишича, ўзбекистонлик мобил интернет фойдаланувчилари томонидан «истеъмол қилинаётган» траффик миқдори 2013 йилнинг иккинчи чорагидаги кўрсаткичга нисбатан 5 фоизга ошган. Ўзбекистонда Opera Mini браузерини ишлатувчи энг оммабоп 10та телефон орасида Nokia моделлари пешқадамлик қилмоқда. Эътиборга молик ягона ўзгариш сифатида, учинчи чоракда Apple iPhone ўнинчи ўриндан жой олиб, Nokia монополиясини бузган. Opera Mini’дан фойдаланувчи ўзбекистонлик Android-смартфонлар ўнталигида, Artel Adi5 қурилмасини ҳисобга олмаса, асосан Samsung моделлари етакчилик қилмоқда.

Ўзбекистонлик Opera Mini фойдаланувчилари орасидаги энг машҳур ўнта сайт рўйхати ўзгармаган. iOS қурилмалари эгалари орасида Opera Mini орқали энг кўп кирилаётган ўнта сайт орасида ягона миллий ресурс – футболга бағишланган uff.uz сайти ўрин олган.